Act 3 | TVK | STEP | Vatei, e tri klok mahis xa be melele te sisen na Siu xil, Pita xal Sion lube Nim Eo na Hi tengan lalosis.

Acts 3

Hoeo Tei xa Len Mikali, Mikakao Rilomun

1 Vatei, e tri klok mahis xa be melele te sisen na Siu xil, Pita xal Sion lube Nim Eo na Hi tengan lalosis. 2 E melele nen ak, rut moletin xil lapo tua tei nae xa latepesi, e len tekali vari, e lalingi sangas ni puiteh te vioh te Nim Eo xa lakesi ni 'Puiteh xa Bos'. Melengien xil ngasen di lapoe ba di lalingi e rute ak tengan ti varam ni vatu mi moletin xil xa di lamei e Nim Eo. 3 Melele xa xi pus Pita xal Sion lumei sangas tengan lalohe nim, miram ni xalu tengan lalosa neta tova mini. 4 Xalu luketeh momal ba ni, e Pita biteni mini bitene, “!Keteh pus xamel!” 5 Ma xi miketeh pus xalu e minemi bit ti ihur neta tova ra xalu. 6 E Pita biteni mini bitene, “Vatu navan tovuol vari, e naha xa nangguri, nisa ni minuk. !E his Iesu Kristo tahal Nasaret, tamea! !Kakao!” 7 Di, dal xat hen metu e dutou ni mitamea misoh. Vatakes, len xalu momal e mei nggeih. 8 Xi butahut be nesao, misoh e di mikakao. Di, be xatel latbe vioh te Nim Eo na Hi. E inggak mun, xi di mikakao, di butahut, e di pet rat his Hi. 9 E melele xa moletin xil lapusi xa di mikakao e di pet rat his Hi mak, 10 lapus kila xa xi be hoeo taxa di tetotan vehakut tete vis 'Puiteh xa Bos,' e di teram mi moletin xil. Xil vus lamesep e latemanin ni naha xa mistal mini.

Pita Misetu mi Moletin Xil e Vioh te Nim Eo

11 Melele xa moletin ak di tamu maheah xat Pita xal Sion, moletin xil vus latemanin e di labesi xil. Laloh lamei visal xatel e rute ak xa lakesi ni 'Horao ma Suv Toto Solomon.' 12 Melele xa Pita pus moletin xil ak, xi biteni mi xil bitene, “?Toxoli xil tahal Isrel, veneh ma mumesep? ?Veneh ma di mupus xamel mak? ?Munemi mubit moletin ak mikakao nggo xeihen namel tang, mu vengan xa sexien namel momal pe met Hi? !E-e! 13 Xi xa be Hi na Ebraham, Hi na Aesak, Hi na Siakop, e Hi na avu nar xil, xi vari iaxa pet rat hisen Iesu be ut nesao, xi xa be moletin te polien nan. E xamim, mutesi ni pe met Paelet e mutelingi tehe hen tengan vahasi vamat. Xi bit vamae ni ha ven vamase, e xamim mutamae ni ti. 14 Xi xa be moletin eo xa bos mutesi ni, e mutesis Paelet sung tengan vamae ni moletin tei xa di bas vin moletin xil mei ven vamase. 15 Xamim mutepol ni ngan xa be Vatit Meulien temat, e Hi tepol ni temeul rilomun ra maten. Xamel matepusi, e taxeak di masep mese ni mi xamim. 16 Xeihen te his Iesu misak ni moletin xa len tekali xiak bemei bos. Naha xa mupusi mistal nggo neketen e his Iesu Kristo. Xi vari tang iaxa pol ni moletin ak milonge bos pe metemim.

17 “Tua navan xil, nakila xa naha xa xamim tetel vat namim xil mutepol ni mi Iesu, mutepol ni vengan xa mutenakil ti. 18 E suse ak, Hi tepol ni lingxatien nan mei testal tehe reitin. Vengan xa tetiamu, texo provet xil nan, Hi teke mese ni xa Kristo nan mei ilong pangas xi. 19 Mak, ma iemim isae ve tesaen xil namim e muhiles meulien namim. Mumei visal Hi tengan iketeh ihos mun mi xamim, 20 ipol ni sien iti e meulien namim, e isa rilomun ni ngan xa tehosei tengan vateh meulien e xamim, Iesu Kristo. 21 Xi ixulehi itat ut nesao ha vuma ... Hi ipol ni holesok xil vus imei ihe neta hu. Ixoni naha xa Hi tehit xati tetiamu texo provet eo nan xil. 22 Texoni ngan Mosis tehiteni tehitene, 'Hi xa be Suv namim ipet rat tei e xamim imei ihe provet tei ixoni nou. Muteong xat holesok xil ngasen xa xi ihiteni mi xamim. 23 E xosxa ti e xamim linateong xat provet ak ti, ma Hi isil rerat xil ra moletin nan xil e ihas xil lilel.'” ^{▼▼3:23 Dut 18:15,18,19}

24 E Pita biteni mun mi xil bitene, “Reitin mak, provet Samuel del provet xil xa latemei tetutou ni, xil vus lateke mese ni holesok xil xa di mistal taxeak. 25 Xir del provet xil ak, rabe mol-Isrel xil, ma hitxatien xa nggeih xa Hi tepol ni tetel xil be nar vus. Nggoni ngan Hi tehit xati mi Ebraham tehitene, 'Ixo vatimol nam xil, inou nituxol xat moletin xil ngasen te ut etan.' ^{▼▼3:25 Jen 22:18} 26 Mak, ma melele xa Hi tesa moletin nan temei, tesa ni mi xir tetiamu. Bit vatuxol xat xir melele xa isak ni xir rihiles meulien nar ra sexien tesa xil nar.”